Tramp mis importiga 50 foizlik bojlar haqida ma’lum qildi

AQSh prezidenti Donald Tramp savdo mojarosini kengaytirmoqda: u mis importiga 50 foizlik tariflarni joriy etish va tibbiy mahsulotlarga bojlarni oshirish bilan tahdid qilmoqda. Bu haqda Tramp 8 iyul, seshanba kuni Oq uyda bo‘lib o‘tgan uchrashuvda ma’lum qildi.

Natijada, bozorlarda mis narxi keskin ko‘tarilib, rekord darajaga — bir tonna uchun 12 330 dollarga yetdi. Bundan tashqari, Donald Tramp dori vositalariga 200 foizlik boj joriy etish bilan tahdid qilgan. Shu bilan birga, u ishlab chiqaruvchilarga «ishlarini tartibga solish» uchun bir yil vaqt ajratishga va’da berdi.

Mis tariflari qachon kuchga kirishi hozircha aniq emas. Ular po‘lat, alyuminiy va avtomobillar bo‘yicha mavjud bojlarga qo‘shimcha hisoblanadi. Shu bilan birga, Donald Tramp 7 iyul kuni YeI va boshqa ba’zi mamlakatlardan importga savdo bojlarini oshirishni kechiktirdi: qoidalar 8 iyuldan kuchga kirishi kerak edi, biroq bu muddat 1 avgustga ko‘chirildi.

Mis elektromobillar, qurollar va elektr tarmoqlari uchun asosiy rol o‘ynaydi. Oq uyning ta’kidlashicha, ushbu metall importiga bojlarni oshirish mahalliy ishlab chiqarishni rag‘batlantirishi kerak. Yyel universitetidagi The Budget Lab tahliliy markazi tomonidan o‘tkazilgan tadqiqotga ko‘ra, amerikalik iste’molchilar allaqachon mis importiga joriy qilingan 17,6 foizlik tariflarning salbiy oqibatlariga duch kelgan – bu 1934 yildan beri eng yuqori ko‘rsatkichdir.