Qarorga ko‘ra, deputatlar Toshkent shahrida 2023 yilda mavsumiy gullarni ekish ishlari bilan bog‘liq xarajatlar uchun 6,2 mlrd so‘m hamda tuman obodonlashtirish boshqarmalariga gul ko‘chatlari ekish uchun 5,8 mlrd so‘m ajratilishini ma’qullagan.
Shuningdek, Toshkent shahar Obodonlashtirish bosh boshqarmasi tizimidagi ixtisoslashtirilgan boshqarmalarga 3,7 mlrd so‘m ajratilishi belgilangan. Bu mablag‘lar tizimdagi «avtotransport vositalari va ishchi xodimlari bilan tasarrufidagi obodonlashtirish obektlarini saqlash, mexanik usulda va qo‘l kuchi bilan tozalash, suv sepish, xazonrezgi davrida ko‘chalarni tozalash, qishda mavsumida qum-tuz qorishmasini sepish, qor uyumlaridan tozalash, ularni olib chiqib ketish, ko‘kalamzorlashtirish ishlari va ishlab chiqarish ehtiyojlari, yonilg‘i mahsulotlari narxi oshganligi»dan kelib chiqib ajratilayotgani qayd etilgan.
Shuningdek, poytaxtning Yunusobod tumanidagi Obod mahalla hududini obodonlashtirish, muhandislik tarmoqlarini va ichki yo‘llarni ta’mirlash ishlarini amalga oshirish bo‘yicha tanlov (tender) savdolarini o‘tkazish uchun 1,49 mlrd so‘m yo‘naltiriladi.
Bundan tashqari tumandagi Yunusobod mahalla hududini obodonlashtirish, muhandislik tarmoqlarini va ichki yo‘llarni ta’mirlash ishlarining loyiha-smeta hujjatlarini ishlab chiqish uchun yana 210 mln so‘m mablag‘ ajratilishi qayd etilgan.
Ushbu xarajatlar uchun mablag‘lar Toshkent shahar mahalliy budjetining 2023 yilda shakllangan qo‘shimcha manbalari hisobidan ajratilishi qarorda belgilangan.
