Ukraina Qurolli kuchlari Harbiy-havo kuchlari ma’lumotiga ko‘ra, MiG-29 qiruvchi samolyoti 10-avgust kuni kechqurun Odessa viloyatida jangovar topshiriqni bajarish chog‘ida yo‘qotilgan.
Ma’lum qilinishicha, uchuvchi Odessa viloyati osmonida havodagi nishonlarni yo‘q qilish bo‘yicha jangovar vazifani bajarayotgan bo‘lgan.
Dastlabki ma’lumotlarga ko‘ra, aviatsiya raketasini uchirish vaqtida samolyot bortida favqulodda holat yuz bergan. Shundan so‘ng MiG-29 yonib ketgan va uchuvchi uni boshqarish imkoniyatini yo‘qotgan.
Ukraina Harbiy-havo kuchlari uchuvchi samolyotni saqlab qolishga harakat qilganini, biroq buning imkoni bo‘lmaganini ma’lum qildi.
Natijada uchuvchi MiG-29dan muvaffaqiyatli katapulta qilgan. U hodisa joyidan tibbiyot muassasasiga yetkazilgan. Hozircha uning ahvoli haqida batafsil ma’lumot berilmagan.
Hodisaning aniq sabablarini aniqlash ishlari olib borilmoqda.
MiG-29 bilan bog‘liq hodisadan sal avval Ukraina harbiylari Rossiyaga tegishli deb ko‘rsatilgan reaktiv dronlar Odessa viloyatidagi Pivdenne port shahri tomon harakatlanayotgani haqida xabar bergan edi. Biroq ushbu dronlarning samolyot halokatiga aloqadorligi haqida ma’lumot keltirilmagan.
Bu Ukraina harbiy aviatsiyasida so‘nggi vaqtlarda qayd etilgan birinchi shunday hodisa emas.
29-iyul kuni Rossiya havo nishonlarini tutib qolish bo‘yicha jangovar vazifani bajarayotgan Ukraina F-16 qiruvchi samolyotida ham favqulodda holat yuz bergan. O‘shanda ham uchuvchi katapulta qilib, omon qolgan.
Iyun oyi oxirida esa Ukrainaga tegishli yana bir MiG-29 Poltava viloyatida halokatga uchragan. Ushbu samolyot uchuvchisi ham o‘z vaqtida katapulta qilib, qutqarib qolingan.
