Россия Қуролли кучлари 20 июл куни кундузи Одесса шаҳрига навбатдаги ҳужумни амалга оширди. Украина маҳаллий ҳокимияти маълумотига кўра, зарбалар фуқаролик инфратузилмаси объектларига тўғри келган.
Дастлабки маълумотларга кўра, ҳужум оқибатида уч киши ҳалок бўлган. Яна олти нафар фуқаро жароҳат олган. Улардан икки нафари шифохонага ётқизилган бўлиб, бирининг аҳволи оғир, иккинчисиники эса ўртача оғир деб баҳоланмоқда.
Маҳаллий расмийлар билдиришича, ҳужум фуқаролик корхонасига ҳам зарар етказган. Оқибатда техника ёниб кетган, газ қувурига шикаст етган.
Шу билан бирга, Одесса вилояти ҳокимияти 19 июл куни Қора денгиздаги Golden Leo қуруқ юк кемасига қилинган ракета ҳужуми қурбонлари ҳақида янгиланган маълумотни эълон қилди. Гвинея-Бисау байроғи остида ҳаракатланган ва дон юкини ташиб кетаётган кема учта қанотли ракета билан нишонга олинган.
Қидирув-қутқарув ишлари натижасида ҳалок бўлган барча 10 нафарнинг жасади топилган. Улар орасида лоцман ҳамда экипаж аъзолари бор. Яна саккиз нафар экипаж аъзоси ҳужумдан сўнг қутқарилиб, қирғоққа эвакуация қилинган.
Бу орада Запорижжя шаҳрида ҳам Россиянинг дрон ҳужуми қайд этилди. Вилоят ҳарбий маъмурияти маълумотига кўра, озиқ-овқат саноати корхонаси нишонга олинган. Ҳужум оқибатида тўрт киши жароҳатланган, ишлаб чиқариш биноси ва ускуналарга зарар етган.
Шу куни эрталаб Запорижжяга бошқариладиган авиабомбалар билан берилган бошқа бир зарба натижасида бир киши ҳалок бўлиб, яна беш нафар фуқаро жароҳат олган. Ҳужум оқибатида турар-жой ва нотурар бинолар ҳам вайрон бўлган.
Херсон вилоятида эса артиллерия ҳужуми натижасида шифохона нишонга олинган. Вилоят прокуратураси маълумотига кўра, етти киши, жумладан шифокор, ҳамширалар, техник ходимлар ва икки нафар ташриф буюрувчи жароҳатланган.
Днипропетровск вилоятининг Павлоград шаҳри ҳам ҳужумга учради. Маҳаллий ҳокимият маълум қилишича, икки киши ҳалок бўлган, яна 15 нафар, жумладан бир ёшли қизалоқ жароҳат олган. Шаҳарда кўп қаватли уйлар ва автомобилларга зарар етган.
Днипропетровск вилояти кенгаши раиси Николай Лукашукнинг айтишича, Павлоград тарихида илк бор бошқариладиган авиабомбалар билан нишонга олинган. Унинг таъкидлашича, бу қуроллар аввал асосан фронт чизиғига яқин аҳоли пунктларига қарши қўлланган бўлса, эндиликда анча узоқдаги шаҳарларга ҳам таҳдид солмоқда.
