Musobaqa «Kurash milliy sport turini rivojlantirish va uning xalqaro nufuzini yanada oshirish chora-tadbirlari to‘g‘risida»gi Prezident qarori ijrosi doirasida, 26-28 noyabr kunlari tashkil qilindi. Unda Qirg‘iziston, Tojikiston va Qozog‘istondan 30 ga yaqin, O‘zbekistonning barcha viloyatlaridan 200 ga yaqin polvon kurash gilamiga chiqdi. Erkaklar 6 ta vazn toifasida, ayollar 4 ta vazn toifasida g‘oliblik uchun kurashdilar.
Turnir o‘zbekistonlik sportchilarning yaqqol ustunligi ostida o‘tdi. Ular 10 ta oltin, 10 ta kumush, 18 ta bronza medalini qo‘lga kiritib, umumjamoa hisobida 1-o‘rinni egalladilar. Tojikiston va Qozog‘iston kurashchilar 1 tadan bronza medalini qo‘lga kiritishdi.
Oltin medal qo‘lga kiritgan sportchilar – Xurshid Choriyev (-55 kg), Mirfayz Bahriddinov (-66 kg), Alimardon Abdulaxatov (-73 kg), Abdulaziz Abdulazizov (-81 kg), Jahongir Mamatrahimov (-90 kg), Muhammadqodir Mansurov (+90 kg), Sitora Elmurodova (-52 kg), Olya Hamidova (-63 kg), Shahnoza Bozorova (-70 kg), Pokizaxon Kamoliddinova (+70 kg).
O‘zbekiston milliy jamoasi tarkibida ishtirok etgan xorazmlik sportchilar 1 ta kumush va 9 ta bronza medaliga ega bo‘lishdi. Kurash federatsiyasining Xorazm viloyat bo‘limiga esa «Damas» rusumli avtomashina sovg‘a qilindi.
