Lissabonning “Sporting” klubi himoyachisi Sebastyan Koates o‘yin vaqtida o‘z jamoadoshi, darvozabon Romen Salenning hayotini saqlab qoldi. Bu haqda Daily Mail nashri xabar berdi. 

Voqea Portugaliya chempionatida “Sporting”ning “Portimonense”ga qarshi o‘yini vaqtida yuz bergan. Uchrashuvning 44-daqiqasida “Sporting” darvozasiga 2-to‘p kirgan. Darvozabon to‘pni qaytarish vaqtida boshi bilan darvoza ustuniga urilgan va shundan keyin hushini yo‘qotgan.

Salenga birinchi yordamni aynan Koates ko‘rsatgan, u jamoadoshi tilining orqaga ketib qolishi oldini olgan.

E'tiborlisi, futbolchi o‘yinda nafaqat jamoadoshi hayotini saqlab qolgani, balki o‘z hisobiga gol yozib qo‘ygani bilan ham ajralgan. Biroq shunga qaramay, “Sporting” raqib klubga 4:2 hisobida yutqazgan.