Turizmni rivojlantirish davlat qo‘mitasi raisi Aziz Abduhakimovning KUN.UZ'ga ma'lum qilishicha, Yaponiyaning Tokio, Nagoya, Osaka va Fukuoka shaharlaridan O‘zbekistonga charter reyslar 2018 yilning aprel oyidan shu yilning oktabr oyigacha amalga oshirilishi rejalashtirilgan. Hozirga kelib bahorgi va yozgi bir haftalik turpaketlar to‘liq sotib bo‘lingan, kuzgi reyslar esa to‘ldirilmoqda.
6 aprel kuni Yaponiyadan O‘zbekistonga ilk charter reys (Tokio-Samarqand-Toshkent) amalga oshirildi. Turizmni rivojlantirish davlat qo‘mitasi Samarqand hokimligi bilan birgalikda Samarqand aeroportida yaponiyalik mehmonlarni karnay-surnay sadolari ostida tantanali ravishda kutib olish marosimini o‘tkazdi. Har bir sayyohga guldastalar va quritilgan mevalardan iborat sovg‘alar topshirildi.
"Hozircha Yaponiyadan O‘zbekistonga amalga oshiriladigan charter reyslar soni 15 ta bo‘lishiga kelishilgan. Kelgusida ularning sonini 25 tagacha oshirish rejalashtirilmoqda", - deydi Abduhakimov.
Ma'lum bo‘lishicha, yaponiyalik sayyohlar uchun "Registon" maydonida O‘zbekistonning taniqli madaniyat va san'at arboblari ishtirokida milliy qo‘shiqlar va raqslardan iborat konsert dasturi, o‘zbek milliy liboslari namoyishi, 3D-mapping shousi tashkil etiladi.
Mehmonlar tashrif davomida O‘zbekistonning Samarqand, Buxoro, Xiva, Urganch va Toshkent shaharlarida bo‘lishadi.
