Yevropadagi jazirama tufayli Dunay sayozlashib qoldi – suratlar

Yevropadagi rekord darajadagi issiq Dunay daryosida suv sathi so‘nggi 30 yil ichidagi eng past darajaga tushishiga olib keldi. Daryo sayozlashishi nafaqat kemachilikka to‘sqinlik qilmoqda, balki Vengriya va Ruminiyadagi atom elektr stansiyalari ishlashiga ham ta’sir qilmoqda. Bu vaqtda Bolgariyada olimlar suv sathi pasayishi tufayli mamontlar suyaklarini topib olgan. Serbiyada esa nemislarning Ikkinchi jahon urushi davrida, 1944-yilda cho‘kib ketgan harbiy kemalari qoldiqlari suv yuzasiga chiqib qolgan. Ekspertlar baholashicha, Dunay tubida jami 200 ga yaqin turlicha kemalar, jumladan, buksirchi kemalar va barjalar yotibdi. Ular daryoning bir qancha uchastkalarida kemalar suzishini qiyinlashtiradi, bu esa yuk tashish kechikishiga va Serbiya uchun yillik moliyaviy yo‘qotishlarga olib keladi. 2024-yilda Yevroittifoq Dunayni qoldiqlardan tozalash bo‘yicha loyihani yo‘lga qo‘ygandi. Bu vazifa 2028-yilgacha bajarilishi ko‘zda tutilgan. Quyida sayozlashib qolgan Dunay qanday ko‘rinishda ekani aks etgan fotosuratlar.