Bu haqda 24 iyul kuni Sankt-Peterburgning «Fontanka» nashri xabar berdi.
Sankt-Peterburg Qonunchilik majlisiga saylovlar 18–20 sentyabr kunlari o‘tkazilishi rejalashtirilgan. «Yabloko» yagona saylov okrugi bo‘yicha 62 nafar nomzodni ilgari surishni rejalashtirgan edi.
Shahar saylov komissiyasi raisi o‘rinbosari Oleg Zatsepaning aytishicha, partiya 15 iyul kuni saylovda ishtirok etish uchun zarur hujjatlar to‘plamini, jumladan, moliyaviy hisobotni taqdim etgan.
Biroq komissiya xulosasiga ko‘ra, moliyaviy hisobotni imzolagan partiya vakili bunday vakolatga ega bo‘lmagan.
«Moliyaviy hisobot amalda taqdim etilmagan deb hisoblanadi, chunki uni imzolash vakolati bo‘lmagan shaxs imzolagan. Bu kamchilikni bartaraf etib bo‘lmaydi», - deya Zatsepaning so‘zlarini keltiradi «Rotonda» Telegram-kanali.
«Yabloko» komissiya xulosasiga qo‘shilmadi
«Yabloko» vakili Pavel Shapchits saylov komissiyasi yig‘ilishida bu xulosaga e’tiroz bildirdi.
Uning ta’kidlashicha, partiya vakiliga berilgan ishonchnomadagi vakolatlar ro‘yxati cheklangan emas. Hujjatda «jumladan» degan so‘z ishlatilgani sababli partiya o‘z huquqshunosi moliyaviy hisobotni taqdim etish vakolatiga ega bo‘lgan, deb hisoblaydi.
Sankt-Peterburg saylov komissiyasi raisi Maksim Meyskin esa Rossiya Markaziy saylov komissiyasi hujjatlariga tayanib, ishonchnomada to‘g‘ridan to‘g‘ri ko‘rsatilmagan vakolatlar berilmagan deb hisoblanishini aytdi.
Shundan so‘ng komissiya «Yabloko» nomzodlarini Sankt-Peterburg Qonunchilik majlisi saylovlarida ishtirok etish uchun ro‘yxatga olishga qarshi ovoz berdi.
Partiya rahbari Markaziy saylov komissiyasiga murojaat qilgan
Komissiya qarori qabul qilinishidan bir necha soat oldin «Yabloko» partiyasi raisi Nikolay Ribakov Rossiya Markaziy saylov komissiyasi raisi Ella Pamfilovaga ochiq murojaat yo‘llagan.
Murojaat «ro‘yxatga olish rad etilishiga tayyorgarlik ko‘rilayotgani munosabati bilan» yuborilgan.
Ribakov Pamfilovadan vaziyatga aralashishni va hal qiluvchi ovoz huquqiga ega Markaziy saylov komissiyasi a’zosini Sankt-Peterburg saylov komissiyasi yig‘ilishida ishtirok etish uchun yuborishni so‘ragan.
Shu bilan birga, Sankt-Peterburg saylov komissiyasi boshqa bir qator siyosiy partiyalarning nomzodlar ro‘yxatini saylovda ishtirok etish uchun ro‘yxatdan o‘tkazgan.
Xususan, «Adolatli Rossiya», «Yangi odamlar» va Rossiya Federatsiyasi Kommunistik partiyasi ro‘yxatlari tasdiqlangan. Bundan avval «Yagona Rossiya» va «Yashillar» partiyalarining ro‘yxatlari ham ro‘yxatdan o‘tkazilgan edi.
LDPR nomzodlarini ro‘yxatdan o‘tkazish masalasi keyinroq ko‘rib chiqilishi kutilmoqda.
