Reuters таҳлилига кўра, Россиянинг 2026 йил июль ойида нефт ва газ сотишдан оладиган даромадлари 2025 йилнинг июл ойига нисбатан тахминан 60 фоизга юқори бўлади.
Россия АҚШ ва Саудия Арабистонидан кейин дунёда нефт ишлаб чиқариш ва экспорт қилиш бўйича учинчи ўринда туради. Мамлакат федерал бюджети даромадларининг қарийб бешдан бир қисми нефт-газ соҳаси ҳисобига шаклланади.
Агентлик таъкидлашича, даромадларнинг ўсишига асосан халқаро бозорда нефт нархларининг ошиши туртки бўлган. Шунингдек, жорий йилнинг иккинчи чорагида нефт қазиб олишдан олинадиган фойда солиғи тушумларининг сезиларли кўпайиши ҳам умумий даромад ўсишига ҳисса қўшган.
Шу билан бирга, Reuters ҳисоб-китобларига кўра, 2026 йилнинг январ–июл ойлари якуни бўйича Россиянинг нефт ва газдан тушадиган умумий даромадлари ўтган йилнинг мос даврига нисбатан 11 фоизга кам бўлиши мумкин. Таҳлилда ушбу кўрсаткич 4,9 трлн рубл атрофида бўлиши прогноз қилинган.
Россия Молия вазирлиги нефт ва газ даромадлари бўйича июл ойи расмий статистикасини 5 август куни эълон қилиши кутилмоқда.
Reuters эслатишича, 2025 йил якунларига кўра Россия федерал бюджетига нефт ва газдан тушган даромадлар 24 фоизга қисқариб, 8,48 трлн рублни ташкил этган. Бу 2020 йилдан буён қайд этилган энг паст кўрсаткич ҳисобланади.
Айни пайтда, 23 июлдан Европа Иттифоқининг Россияга қарши 21-санкциялар пакети кучга кирди. Янги чекловлар Россия бюджетига нефть савдосидан тушадиган маблағларни қисқартиришга қаратилган. Европа Иттифоқи ушбу даромадлар Москва томонидан Украинага қарши ҳарбий ҳаракатларни молиялаштириш учун сарфланаётганини таъкидлаб келмоқда.
