Украина Wildberries омборларини ёндиришда давом этмоқда

Украина ҳарбийлари 22 июлга ўтар кечаси ва тонгда дронлар билан Wildberries’нинг Краснодардаги ва Ставропол ўлкаси Невинномисск шаҳридаги омборларига ҳужум уюштирди.

Зарбалар оқибатида омборларда кучли ёнғинлар юзага келган. Кубан региони губернатори Вениамин Кондратевнинг айтишича, Краснодардаги ҳужум вақтида яраланган қиз вафот этган, яна уч киши шифохонада қолмоқда, олти кишига тиббий ёрдам кўрсатилиб, уйига жавоб берилган. Невинномисскда эса беш киши жароҳатланган, уларни шифохонага ётқизишга зарурат бўлмаган.

Краснодар ўлкаси расмийлари аҳолини очиқ ҳавода қолмасликка, кўчага чиқишга тўғри келганда ниқоб ва респираторлардан фойдаланишга чақирган.

Ёнғиндан кейин кўтарилган тутун ўнлаб километрларга чўзилган. «Агентство» нашри эътибор қаратишича, кечгача тутун Қора денгиз соҳилига, жумладан, Владимир Путиннинг Геленжикдаги Идокопас бурнида қурилган саройигача етиб келган.

Эрталаб Краснодар ўлкасининг оператив штаби телеграм-каналида омбордаги ёнғин видеоси эълон қилинди, бу журналистлар эътиборини тортди, чунки расмий органлар Украина ҳужумлари оқибатларининг визуал тасдиқларини жуда камдан кам ҳолларда эълон қилади (оддий россияликлар эса бундай кадрларни тарқатгани учун таъқиб қилинади). Ярим соатдан кейин ёзув ўчириб ташланди.

Украина президенти Володимир Зеленский ҳужум юзасидан изоҳ бериб, «Россия армиясини дронлар учун бутловчи қисмлар, навигация ускуналари ва бошқа жиҳозлар билан таъминлашда иштирок этаётган логистика марказларига» зарба берилаётганини маълум қилди.

«Тинчликка зарурат бор ва Украина Россия томонига барча таклифларни тақдим этди. Дипломатияга ўтишга мажбурлаш керак», – дея қайд этган Украина президенти.

РФ президенти матбуот котиби Дмитрий Песков ҳар кунги брифинг чоғида Wildberries омборлари бўйлаб янги зарбалар юзасидан муносабат билдирмади. Шанба куни амалга оширилган олдинги ҳужумга Кремл томонидан фақат уч кун ўтиб муносабат билдирилганди – сешанба кунги брифингда Песков маркетплейс ва маҳсулотлари омборларда ёниб кетган хусусий тадбиркорлар кўраётган зарар туфайли «мураккаб вазият» юзага келгани ва ҳукумат «бу масалалар билан шуғулланаётгани»ни айтганди.

Владимир Путин бугун эрталаб ҳукумат билан иқтисодий масалалар бўйича йиғилиш ўтказди. Унинг матбуот учун очиқ қисмида Wildberries омборларига берилган зарбалар тилга олинмаган. Шу билан бирга, Россия президенти Украина нафақат нефтни қайта ишлаш заводларига, балки «баъзи бошқа секторларга» ҳам зарба бераётганига қарамай, Россия иқтисодиётида ҳаммаси жойида эканига ишонтирган:

Йиғилишимизнинг бошиданоқ шуни таъкидламоқчиманки, мамлакатимиз иқтисодиёти, иқтисодиёт тармоқлари, унинг асосий тармоқлари ҳолати, ҳатто ёқилғи-энергетика мажмуаси ва бошқа айрим тармоқлардаги вазиятни беқарорлаштиришга қаратилган ташқи уринишларга қарамай, барқарор бўлиб қолмоқда.