Ўзбекистон ҳукумати Ташқи меҳнат миграцияси агентлигининг собиқ бўлим бошлиғи Азизбек Тоштемировни халқаро қидирувга берди.
Интерпол расмий сайтида унинг қидирувда экани ҳақида “қизил билдиришнома” жойланган.
Қидирув карточкасида кўрсатилишича, 35 ёшли Тоштемиров фирибгарликда айбланмоқда.
Азизбек Тоштемиров исми Kun.uz'нинг 2023 йилги суриштирувларидан бирида тилга олинган эди. Видеотасвирларда кўринишича, у Кореяга ишлаш учун бориш истагидаги ўзбекистонликларни саралаб олиш жараёнида ўз танишларини бошқаларнинг ўрнига имтиҳонга киритган бўлиши мумкин.
Бугун, 14 май куни Бош прокуратура ҳузуридаги Департамент Миграция агентлигининг собиқ мансабдорлари билан боғлиқ гуруҳ фош этилгани ҳақида хабар берди. Аниқланишича, Кореяга ишга юбориш учун расмий тўловлардан ташқари одамлардан 7-12 минг доллардан пул йиғилган ва умумий сумма қарийб 90 млн долларни ташкил этиши мумкин.
Мазкур жиноий гуруҳ ва Азизбек Тоштемиров ўртасида боғлиқлик бор-йўқлиги маълум эмас.
