Reuters агентлигининг хабар беришича, Европа Иттифоқининг рақобатни назорат қилувчи асосий органи — Европа комиссияси Paramount Skydance компанияси томонидан Warner Bros. Discovery (WBD) медиахолдингини 110 миллиард долларга сотиб олиш бўйича битимга розилик берди.
Комиссия маълум қилишича, Paramount Skydance Европа бозорида рақобатга доир хавотирларни бартараф этиш учун қатор мажбуриятларни ўз зиммасига олган.
UIP фаолияти тугатилади
Келишувга мувофиқ, битим расман якунланганидан кейин 13 ой ичида Paramount Skydance Европа ҳудудида United International Pictures (UIP) компанияси фаолиятини тўхтатади.
UIP — Paramount ва Universal Pictures томонидан ташкил этилган қўшма кино дистрибуцияси компанияси ҳисобланади.
Шунингдек, Paramount Skydance кейинги 10 йил давомида Universal Pictures билан Европада филмлар дистрибуцияси бўйича янги келишувлар тузмаслик мажбуриятини олди.
Бундан ташқари, Warner Bros. фильмларининг кинотеатрлардаги тарқатиш ҳуқуқлари Paramountʼнинг ўз дистрибьюторига берилмайди.
Еврокомиссия айнан шу мажбуриятлар рақобат муҳитига оид хавотирларни бартараф этганини билдирди.
АҚШда битим суд томонидан тўхтатилган
Шу билан бирга, АҚШда мазкур келишув ҳозирча амалга оширилмайди.
Ўтган ҳафта Калифорния штати, Окленд округ суди судяси Арасели Мартинес-Олгин 12 штат бош прокурорларининг қўшма мурожаатини қаноатлантириб, битимни 14 кунга вақтинча тўхтатиш ҳақида қарор чиқарди.
Калифорния бош прокурори Роб Бонта ва бошқа прокурорлар фикрича, бундай йирик бирлашув кино прокати ҳамда кабел телеканаллари контентини лицензиялаш бозорида рақобатни сусайтириши мумкин.
Йирик медиа активлар бир қўлга ўтиши мумкин
Warner Bros. Discovery таркибига Warner Bros. киностудияси, HBO телеканали, HBO Max стриминг платформаси, шунингдек, CNN, TNT Sports ва Discovery каби йирик телеканаллар киради.
Агар битим тўлиқ амалга ошса, ушбу активлар Paramount Skydance раҳбари Дэвид Эллисон назоратига ўтади.
Дэвид Эллисон — Oracle корпорацияси асосчиси, миллиардер Ларри Эллисоннинг ўғли ҳисобланади.
Битимга қарши даъволар ҳам мавжуд
Мазкур битимга қарши Америка Сценаристлар гилдияси ҳам судга мурожаат қилган.
Уларнинг фикрича, бирлашув сценаристларнинг меҳнат бозоридаги имкониятларини қисқартиради ва АҚШ кўнгилочар индустриясига салбий таъсир кўрсатиши мумкин.
Бундан ташқари, Буюк Британия ҳам ушбу битимни диққат билан кузатаётганини маълум қилди.
Британия расмийлари бирлашув янгиликлар хизмати, болалар учун телевизион дастурлар ва стриминг платформалари фаолиятига салбий таъсир кўрсатиши мумкинлигидан хавотир билдирган.
