АҚШ Сенатининг ассигнациялар бўйича қўмитасида бўлиб ўтган эшитувларда Пентагон раҳбари Пит Ҳегсет Эронга қарши уруш учун ажратилган маблағлар ҳажми 37,5 миллиард долларга етганини билдирди.
AFP агентлигининг қайд этишича, май ойи ўрталарида ушбу харажатлар тахминан 29 миллиард доллар деб баҳоланган эди. Демак, икки ойдан кам вақт ичида ҳарбий операциялар харажати қарийб 8,5 миллиард долларга ошган.
Пентагон яна 67 миллиард доллар талаб қилди
Пит Ҳегсет АҚШ Қуролли кучлари Бирлашган штаб бошлиқлари қўмитаси раиси генерал Дэн Кейн билан биргаликда Конгрессни сентябр ойи охиригача Эронга қарши операцияларни молиялаштириш учун қўшимча 67 миллиард доллар ажратишни тезроқ маъқуллашга чақирди.
Уларнинг таъкидлашича, мазкур маблағлар «ўта зарур» ҳисобланади.
Шу билан бирга, сўралаётган маблағ таркибига АҚШнинг Яқин Шарқдаги ҳарбий базаларини тиклаш харажатлари киритилмаган.
Конгрессда танқидлар янгради
Пентагоннинг қўшимча маблағ сўрови демократлар ҳам, республикачилар ҳам томонидан танқид қилинди.
Демократ сенатор Жинн Шаҳиннинг айтишича, Мудофаа вазирлиги ихтиёрида аввал ажратилган 75 миллиард доллар маблағ ҳали ҳам мавжуд.
У Ҳегсетга: «Нима учун аввал ажратилган ва ишлатилмаган маблағларни қайта тақсимлаш ўрнига, америкаликлардан қўшимча уруш харажатларини қоплаш талаб этилмоқда?», деган савол билан мурожаат қилди.
Пит Ҳегсет эса мазкур маблағлар аллақачон президент Доналд Трамп маъмуриятининг бошқа устувор дастурларига йўналтирилганини билдирди.
Улар қаторида Golden Dome for America ракетага қарши мудофаа тизими, гипертовушли қуролларни ишлаб чиқиш ҳамда бошқа мудофаа лойиҳалари борлиги айтилди.
Республикачилар ҳам изоҳ талаб қилди
Республикачи сенатор Жон Кеннеди Конгресс Пентагондан «ҳалол ва очиқ жавоблар» кутаётганини билдирди.
У АҚШ Ҳўрмуз бўғозидаги ҳарбий иштирокини тугатган тақдирда қандай оқибатлар юзага келиши мумкинлиги ҳақида сўради.
Хусусан, Эрон бўғоз орқали ўтувчи кемалардан тўлов жорий қилиши мумкинми, деган саволга Пит Ҳегсет ва генерал Дэн Кейн аниқ жавоб беришдан тийилди.
АҚШнинг Эронга қарши ҳужумлари давом этмоқда
21 июл куни АҚШ Қуролли кучлари Эронга қарши навбатдаги оммавий ҳаво зарбаларини амалга оширганини маълум қилди.
Шу тариқа, ҳарбий операциялар кетма-кет ўн биринчи тун ҳам давом этди.
Президент Доналд Трамп эса Truth Social ижтимоий тармоғида Эронни америкалик ҳарбийларнинг эҳтимолий ҳалокати учун «бир неча баробар қаттиқроқ» жавобгарликка тортиш билан таҳдид қилди.
«Эрон ҳар сафар америкалик аскарни ўлдирса, бунинг учун бир неча баробар оғир жазо олади», — деб ёзди у.
Трампнинг сўзларига кўра, бу ҳақдаги буйруқ мудофаа вазирига етказилган.
АҚШ қурбонлари сони ошди
АҚШ Марказий қўмондонлиги (CENTCOM) маълум қилишича, Яқин Шарқдаги навбатдаги эскалация бошланганидан буён яна уч нафар америкалик ҳарбий ҳалок бўлган.
Шу билан феврал ойи охирида Эронга қарши ҳарбий амалиётлар бошланганидан бери ҳалок бўлган АҚШ ҳарбий хизматчилари сони 17 нафарга етди.
