Вазирлар Маҳкамасининг “Ёшлар дафтари”га киритилган талабалар учун давлат ташкилотларида иш ҳақи тўланадиган стажировка тизимини жорий этиш тўғрисида”ги қарори лойиҳаси эълон қилинди.
Қарор лойиҳаси билан “Ёшлар дафтари”га киритилган талабаларнинг давлат идораларида ҳақ тўланадиган стажировка ўташи тўғрисида низом тасдиқланмоқда.
Ушбу низом орқали Меҳнат кодекси, “Таълим тўғрисида”ги қонунга мувофиқ давлат олий таълим муассасаларининг “Ёшлар дафтари”га киритилган талабаларининг давлат идораларида ҳақ тўланадиган стажировка ўташ тартиби белгиланмоқда.
Лойиҳада:
- стажировкани барча босқичларда ташкил этиш стажёрнинг касбий фаолиятни ўзлаштиришнинг узлуксизлиги ва изчиллигини таъминлашга қаратилган бўлиши;
- ногиронлиги бўлган шахслар учун стажировка ўташ уларнинг индивидуал имкониятлари ва соғлиғининг ҳолатини ҳисобга олган ҳолда ташкил этилиши;
- стажёр учун синов муддати белгиланмаслиги;
- стажёрларни иш вақтидан ташқари ишларга жалб этишга, шунингдек, ишланмайдиган байрам кунларида ишлашига йўл қўйилмаслиги;
- давлат ташкилотларида стажировкадан ўтаётган стажёрларнинг меҳнатига ҳақ тўлаш миқдорлари;
- қабул қилувчи ташкилотнинг (стажировка ўташ жойи) жойлашган жойи стажёрнинг яшаш жойидан ёки олий таълим муассасаси жойлашган жойидан ташқарида вақтинча яшашини талаб қилса, стажёрни амалиёт ўташ жойига бориш ва турар жой билан таъминлаш (уй-жой учун тўлов) қабул қилувчи ташкилот томонидан белгиланган тартибда амалга ошириш белгиланмоқда.
Билдирилишича, лойиҳа қабул қилиниши натижасида талабаларнинг ҳақ тўланадиган ишлаб чиқариш стажировкасини ташкил этиш натижасида ОТМ битирувчилари билим, кўникма, касбий ва шахсий компетенциялари ошиши ҳамда бандлиги таъминланади, уларнинг реал ишлаб чиқариш шароитларига касбий мослашуви такомиллаштирилади.
