Агентлик пресс-релизига кўра, «Ўзбекинвест» Ўзбекистонда молиявий барқарорлик бўйича «Ba1» даражасидаги рейтингга эга бўлган ягона молия институти ҳисобланади.
Moody’s Ratings маълум қилишича, компанияга берилган молиявий барқарорлик рейтинги (Insurance Financial Strength Rating – IFSR) унинг Ўзбекистон суғурта бозоридаги мустаҳкам мавқейи, юқори капитал захираси ҳамда активларининг юқори сифатига асосланган.
Шунингдек, агентлик таҳлилчилари компаниянинг юқори сифатли йирик инвестиция портфели ва халқаро қайта суғурта фаолиятидан олинаётган суғурта мукофотлари улушининг юқорилигини ҳам алоҳида қайд этди.
Компаниянинг халқаро рейтинги «Ba1» даражасига кўтарилгани унинг юқори кредитга лаёқатлилигини тасдиқлайди. Бу, шунингдек, андеррайтинг ва инвестиция фаолиятида эришилган юқори натижалар билан ҳам мустаҳкамланган:
Глобал иштирок: қайта суғурта операциялари географияси 135 та давлатни қамраб олган бўлиб, хориждан олинган даромадлар компаниянинг жами суғурта тушумларининг 50 фоизини ёки 32,5 млн АҚШ долларини ташкил этди.
Экспортни қўллаб-қувватлаш: миллий экспортчиларга тақдим этилган суғурта ҳимояси ҳажми 2,3 млрд долларга етди ва мамлакатнинг жами хомашё бўлмаган экспортининг 41 фоизини қамраб олди.
Бизнес ривожланиши: ялпи суғурта мукофотлари йиғими ўтган йилнинг шу даврига нисбатан 132 фоизга ошди. Шу билан бирга, сўнгги 9 йилда суғурта мукофотларининг умумий ҳажми 41 млрд сўмдан 935 млрд сўмгача, яъни 22 баробардан зиёд ўсди.
Корпоратив портфел: корпоратив сегментда 398 млрд сўм суғурта мукофотлари йиғилди, шундан 42 млрд сўми инвестиция лойиҳаларини суғурталаш ҳиссасига тўғри келади.
Бозордаги мавқейи: компания мажбурий суғурта бозорида 20 фоизлик улуш билан етакчилик мақомини сақлаб қолмоқда. Жисмоний шахслар сегментида суғурта мукофотлари сўнгги 9 йилда 4,9 млрд сўмдан 140 млрд сўмгача, яъни 29 баробарга ошди. Компания мижозлари сони эса 2017 йилдаги 70 минг нафардан 2026 йилда 1,1 миллион нафаргача, яъни 15 баробарга кўпайди.
«Ўзбекинвест» компаниясининг халқаро рейтинги «Ba1» даражасига кўтарилгани унинг халқаро фаолияти изчил кенгайиб бораётгани, бизнеси барқарор суръатларда ривожланаётгани ҳамда халқаро ва маҳаллий мижозлар ҳамда ҳамкорлар учун ишончли шерик сифатида ўз мавқеини янада мустаҳкамлаётганини тасдиқлайди.
Колл-марказ: (+998) 71−207−60−00, 1160
