АҚШ Давлат департаменти Кубага 100 миллион долларлик ҳуманитар ёрдам пакети доирасида биринчи самолёт жўнатилганини маълум қилди. Reuters агентлигига кўра, бу янги ёрдам дастурининг амалий босқичи бошланганини англатади.
Маълум қилинишича, самолётда озиқ-овқат маҳсулотлари, гигиена воситалари ва бошқа зарур анжомлар олиб келинган. Ёрдам юклари халқаро Catholic Relief Services ҳуманитар ташкилоти орқали бевосита аҳолига тарқатилади. Дастлабки босқичда 700 нафарга яқин кубалик оила ушбу ёрдамдан баҳраманд бўлиши кутилмоқда.
AFP агентлиги эслатишича, Вашингтон аввал ҳам католик ҳуманитар ташкилотлари билан ҳамкорлик қилиб, «Мелисса» довулидан жабр кўрган Куба ҳудудларига 9 миллион долларлик ёрдам етказган эди.
АҚШ давлат котиби Марко Рубио мазкур ҳуманитар пакет ҳақида май ойидаёқ эълон қилган. Унинг таъкидлашича, дастурнинг асосий мақсади Куба аҳолисини қўллаб-қувватлашдан иборат. Шу билан бирга, Вашингтон Куба ҳукуматига нисбатан иқтисодий босимни кучайтиришда давом этмоқда. АҚШ молиявий санкциялар жорий этган, шунингдек, оролга нефт етказиб беришга чекловларни ҳам кучайтирган.
Куба ҳукумати дастлаб мазкур таклифга эҳтиёткорлик билан муносабат билдирган. Расмий Ҳавана АҚШни мамлакатдаги электр энергияси танқислиги ва товарлар етишмовчилигининг асосий сабабчиларидан бири сифатида айблаган. Бироқ Доналд Трамп маъмурияти вакиллари билан ўтказилган музокаралардан сўнг Куба ҳуманитар ёрдамни қабул қилишга розилик берган.
Шу билан бирга, АҚШ ва Куба ўртасидаги сиёсий муносабатлар кескинлигича қолмоқда. 15 июл куни CBS News Пентагон Кубага нисбатан эҳтимолий ҳарбий операция сценарийларини, жумладан, 101-десант дивизияси ҳарбийларини оролга тушириш имкониятини ҳам кўриб чиқаётгани ҳақида хабар берган эди. Бироқ америкалик амалдорлар ҳозирча бундай операция бўйича якуний қарор қабул қилинмаганини билдирган.
АҚШ мудофаа вазири Пит Ҳегсет аввалроқ Куба АҚШ хавфсизлигига таҳдид солувчи қурол-яроғларни қўлга киритса, куч ишлатиш эҳтимоли истисно қилинмаслигини айтган. Унинг сўзларига кўра, разведка маълумотлари Куба Гуантанамо ҳарбий базаси, АҚШ ҳарбий кемалари ва Флорида ҳудудига эҳтимолий зарбалар учун 300 дан ортиқ дрон сотиб олганини кўрсатган.
Бироқ CBS News манбаларига кўра, АҚШ ва Исроилнинг Эрон билан давом этаётган ҳарбий можароси шароитида Кубага қарши кенг кўламли ҳарбий операция яқин вақтда амалга оширилиши эҳтимоли паст. Шу сабабли Вашингтон ҳозирча Кубага асосан иқтисодий ва дипломатик босим ўтказиш стратегиясига таяниб турибди.
23 июн куни АҚШ Кубанинг бир қатор йирик давлат компанияларига қарши янги санкциялар жорий қилди. Улар орасида мамлакат иқтисодиётининг катта қисми устидан назорат ўрнатган GAESA конгломерати билан боғлиқ корхоналар ҳам бор. Куба ташқи ишлар вазири Бруно Родригес ушбу чекловларни мамлакатга қарши навбатдаги иқтисодий босим деб баҳолади.
