Учтепа туманидаги Rayyan Kids боғчасига берилган лицензия бекор қилинди. Бу ҳақда Тошкент шаҳар судлари матбуот хизмати хабар берди.
Маълум қилинишича, Тошкент туманлараро иқтисодий судида Мактабгача ва мактаб таълими вазирлигининг жавобгар “Rayyan Kids Land” оилавий корхонасига нисбатан лицензияни бекор қилишга оид ҳуқуқий таъсир чорасини қўллаш тўғрисидаги аризаси кўриб чиқилган.
Муҳокама якунида суднинг ҳал қилув қарори билан оилавий корхонага нодавлат таълим хизматларини кўрсатиш фаолиятини амалга ошириш учун 2025 йил 13 августда берилган лицензия бекор қилинган. Раислик қилувчи томонидан суд ҳужжати мазмуни ҳамда унга нисбатан шикоят қилиш тартиби ва муддатлари тушунтирилган.
Шунингдек, Kun.uz’нинг аниқлашича, Rayyan Kids боғчаси тарбиячиси Г.А.га нисбатан Жиноят кодексининг 110-моддаси (қийнаш) 2-қисми “а, в” бандлари билан жиноят иши қўзғатилган. ЖИБ Учтепа туман судининг 2026 йил 3 июлдаги ажрими билан унга уй қамоғи тарзидаги эҳтиёт чораси қўлланган.
Аввалроқ ушбу боғча тарбиячиси болаларни турли хил усулларда қийнаб келгани аниқланганди. У ҳатто йиғлаётган бола оғзига латта тиқиб, уни қийнаган. Kun.uz’га интервю берган ота-оналар боғчада ҳатто болаларга игна санчиб қийнашганини айтганди.
