Бош прокуратура ҳузуридаги департаментнинг Қарши тумани бўлими томонидан ўтказилган терговга қадар текширувда Қашқадарё вилояти Камбағалликни қисқартириш ва бандлик бошқармасининг давлат меҳнат ҳуқуқ инспектори А.Ҳ. муқаддам судлангани ҳолда фирибгарлик содир этгани маълум бўлди.
Текширув давомида аниқланишича, у ўзининг юқори лавозимларда ишловчи танишлари орқали фуқаро Н.Ҳ.ни Қарши шаҳридаги Республика ихтисослаштирилган Она ва бола саломатлиги илмий-амалий тиббиёт маркази ҳудудий филиалига орастабон лавозимига ишга киритиб қўйишни ваъда қилган.
Бунинг эвазига инспектор фуқародан 800 АҚШ долларини олган. Тергов жараёнида ушбу маблағнинг 200 АҚШ доллари ҳамда 3,3 миллион сўми қайтарилиб, бу ҳолат процессуал тартибда расмийлаштирилган.
Мазкур ҳолат юзасидан Жиноят кодексининг 168-моддаси (фирибгарлик) ҳамда 28, 211-моддалари (пора бериш жиноятига иштирокчилик) билан жиноят иши қўзғатилган. Айни пайтда иш бўйича тергов ҳаракатлари давом этмоқда.
