Human Rights Watch хабарига кўра, қатл этилган икки киши айблов версиясига кўра, 2018 йил 10 август куни Фухайс шаҳридаги фестивал ўтказиладиган жой яқинидаги хавфсизлик кучларининг қўшма патрули ёнида бомба портлатган, оқибатда икки жандармерия ходими ҳалок бўлган ва олти киши яраланган. Эртаси куни портлашни уюштирганликда гумон қилинганларни қўлга олиш операцияси чоғида яна тўрт нафар полициячи ҳалок бўлди.
Учинчи қатл этилган киши 2022 йил декабрь ойида Маъан шаҳрида полиция патрулини пистирма қилган, оқибатда Маъан полиция бошқармаси директори ўринбосари ҳалок бўлган. Қолган уч нафар маҳкум гиёҳванд моддалар савдосига қарши операциялар пайтида ҳуқуқ-тартибот идоралари ходимларини ўлдиргани учун қатл этилган.
2014 йил декабрь ойида Иордания 8 йиллик норасмий мораторийдан сўнг қотилликда айбланган 11 кишини қатл этиш орқали ўлим жазосини қайта тиклади. 2017 йил март ойида 15 нафар эркак қатл этилди, улардан 10 нафари Давлат хавфсизлик суди томонидан терроризм билан боғлиқ айбловлар бўйича ҳукм қилинган. Шу билан бирга, ҳар йили мамлакатда бир неча юз киши ўлим жазосига ҳукм қилинади.
