Давлат раҳбари қайд этганидек, йиғилишга тайёргарлик жараёнида инвесторлар ва халқаро компаниялар томонидан 120 та янги таклиф ҳамда ташаббус келиб тушган. Уларнинг барчаси таҳлил қилиниб, инвестиция муҳити, солиқ тизими, кадастр, энергетика, молия ва банк тизими, корпоратив бошқарув, шунингдек, сунъий интеллект ва рақамли иқтисодиётни қамраб олган еттита устувор йўналишга бирлаштирилган.
Президент, хусусан, валюта айланмасидаги мониторинг жараёнларини енгиллаштириш, исломий суғурта, «яшил» кредит ва банк активлари бозорини шакллантириш каби замонавий молиявий инструментларни жорий қилиш муҳимлигини таъкидлади.
Шунингдек, корхоналар фаолиятида атроф-муҳит муҳофазаси, ижтимоий масъулият ва самарали корпоратив бошқарувни ўз ичига олган ESG тамойилларини кенг қўллашни рағбатлантириш зарурлиги қайд этилди.
Йиғилишда ҳар бир устувор йўналиш бўйича масъуллар белгиланиб, келиб тушган таклифлар асосида аниқ ечимлар ишлаб чиқилиши таъкидланди.
Шу муносабат билан мазкур вазифаларни амалга оширишда фаол иштирок этаётган ишчи гуруҳлар ҳамраислари — Vision Invest, BDO, Crowe, OTP Group, Franklin Templeton, Ernst & Young, Costa Legal ва ACWA Power компаниялари раҳбарларига миннатдорлик билдирилди.
