Маълум қилинишича, айрим шахслар суд органлари номидан СМС-хабарлар тарқатиб, фуқароларни шубҳали ҳаволаларга ўтишга ундамоқда. Бу каби хабарлар орқали шахсий маълумотлар, банк карталари реквизитлари ва бошқа махфий маълумотларни қўлга киритиш мақсад қилинган бўлиши мумкин.
Шу муносабат билан суд органлари суд ишларига оид барча расмий хабарлар эндиликда фақат «СУД» номидан юборилишини маълум қилди.
Фуқаролардан номаълум ҳаволаларга кирмаслик, шахсий маълумотларини учинчи шахсларга тақдим этмаслик ҳамда фақат расмий манбалар орқали олинган ахборотларга ишониш сўралмоқда.
Судлар шубҳали хабарлар келиб тушган тақдирда уларга жавоб қайтармаслик ва ҳаволаларни очмасликни тавсия этмоқда.
