79 ёшли функционер Флорентино Перес Мадриднинг «Реал» клуби президенти лавозими учун сайловда ғалаба қозонди. Клуб расмий аъзолари ўртасида ўтказилган овоз бериш жараёнида унинг номзодини 21 минг 741 киши (65 фоиз) қўллаб-қувватлаган.
Испания гранди президентлиги учун иккинчи номзод бўлган тадбиркор Энрике Рикелме эса 11 814 киши овозини (35 фоиз) қўлга киритган.
Шу тариқа, Перес қаторасига саккизинчи бор клуб президентлиги лавозимини эгаллади – у клубни камида 2030 йилга қадар бошқариши мумкин.
Сайлов натижаларидан кейин у рақибига овоз берган сайловчиларга мурожаат қилди.
«Биз «Реал»га бўлган эҳтиросимиз билан якдил бўлишимиз лозим. Менга овоз бермаганларга юзланмоқчиман: «Сизнинг барча хавотирларингиз билан ҳисоблашиш учун қўлимдан келган барча ишни қиламан!» – дея Переснинг сўзларини келтирган клуб расмий сайти.
Перес сайловолди кампанияси даврида клуб бош мураббийлигига Жозе Моуриниони олиб келишини маълум қилганди. Шунингдек, лавозимга қайта сайланган президент «Ливерпул»дан Ибраима Конате, «Интер»дан Дензел Думфрис трансферини ҳал қилиб қўйган. Яқин вақтлар ичида эса клуб Европанинг номдор клубларидан бирининг юлдузли футболчиси учун 150 миллион евролик таклиф билан чиқиши кутилмоқда.
