2026 йилда Ўзбекистонда аҳоли орасида менингококк инфекцияси билан боғлиқ ҳолатлар бироз ортган. Бу ҳақда Санитария-эпидемиология қўмитаси хабар берди.
Инфекция кенг тарқалишининг олдини олиш мақсадида 8 024 доза вакцина харид қилиниб, беморлар билан мулоқотда бўлган 4 862 киши эмлаш билан қамраб олинган.
Маълум қилинишича, 2026 йил 1 чорагида республикада 174 та менингококк ҳолати рўйхатга олинган. Шундан 168 нафари 14 ёшгача бўлган болаларни ташкил қилмоқда. Касаллик динамикасига кўра, апрел ойида март ойига нисбатан 14 фоизга камайгани кузатилган.
Менингит — бу бош ва орқа мия пардаларининг яллиғланиши бўлиб, кўпинча бактерия ёки вируслар сабабли юзага келади. У тез ривожланиши билан хавфли ҳисобланади.
Қўмита инфекциянинг олдини олиш бўйича қуйидаги чораларни тавсия қилган:
- ўз вақтида эмланиш;
- шахсий гигиена қоидаларига риоя қилиш;
- касаллик аломатлари кузатилганда дарҳол шифокорга мурожаат қилиш;
- жамоат жойларида эҳтиёт чораларини кўриш;
- Ҳаж ва Умра сафарларига боришдан аввал менингококк инфекциясига қарши эмланиш, зиёратдан келгандан сўнг эса оммавий тадбирлардан чекланиш.
Қўмита эмлаш менингококк инфекциясидан ишончли ҳимояланишнинг энг самарали усулларидан бири эканини таъкидлаган.
