Туркия ҳуқуқ-тартибот идоралари маҳаллий аҳолидан 1,32 миллион доллардан ортиқ пулни фирибгарлик йўли билан қўлга киритган жиноий гуруҳни фош этди. Улар сохта «хазина» хариталаридан фойдаланиб, одамларни чув тушириб келган, деб ёзади Hurriyet газетаси.
Маълумотларга кўра, гумонланувчилар Тунжели вилоятининг қишлоқларини кезиб, маҳаллий аҳолига яширин хазиналарни топишни таклиф қилган.
Улар қадимги кўринишга келтирилган қўлда чизилган хариталарни кўрсатиб, атрофда қимматбаҳо артефактлар кўмилганига одамларни ишонтирган. Фирибгарларга алданиб, қишлоқ аҳолиси қазиш ишларини бошлаган ва ер остидан ҳақиқатан ҳам қадимий ҳайкалчалар топилган. Бироқ кейинчалик бу артефактларни фирибгарларнинг ўзи олдиндан кўмиб қўйгани аниқланган.
Фириб шу билан тугамаган. Жиноий схемага ўзини руҳоний сифатида кўрсатган шахс ҳам қўшилган. У видеомулоқот орқали хазина изловчиларни ҳайкалчаларни Туркияда сотиш имконсиз эканига, бироқ чет элда уларга талаб борлиги ишонтирган.
Сохта руҳоний «ўз ёрдами» эвазига пул талаб қилган, натижада фирибгарлар 1,32 миллион доллардан ортиқ маблағ йиғишга муваффақ бўлган. Жабрланувчилар алданганликларини жуда кеч тушуниб етган.
Маҳаллий аҳоли шикоятларидан сўнг жандармия тўққизта вилоятда махсус операция ўтказган. Натижада, 25 киши қўлга олинган, улардан ҳайкалчалар, SIM-карталар, қуроллар ва хорижий валюта мусодара қилинган. Ҳозирда суд жараёни давом этмоқда.
