Жиззахда икки киши ўлган ЙТҲ сабабчиси очиқда қолдирилди. Kun.uz ҳолатга оид иш материаллари билан танишди.
Осмонсойдаги ЙТҲ
Аянчли ЙТҲ 2026 йил 13 март куни кечга яқин Фориш туманининг Осмонсой маҳалласи ҳудудида содир бўлган.
Алишер Яхшибеков Cobalt машинасини йўлнинг қарама-қарши йўналишида бошқариб, ўз йўналишида келаётган иккинчи Cobalt билан тўқнашган. Оқибатда иккинчи машинада йўловчи сифатида кетаётган 61 ёшли эркак ҳамда 39 ёшли аёл ҳалок бўлган. Шунингдек, ушбу машина ҳайдовчиси ва яна бир йўловчи (аёл киши) оғир тан жароҳати олиб, шифохонага ётқизилган.
“Тезлиги камида 140 км/соат эди”
Kun.uz танишган тергов материалларида Алишер Яхшибековнинг кўрсатмаси келтирилган. У ушбу ЙТҲ қандай содир бўлганини эслолмаслигини айтган.
“Машинам нимагадир урилганини, тақиллаган овоз эшитилганини биламан, ундан сўнг нима бўлганини билмайман. Ўзимга келганимда Фориш туман шифохонасида эканман. Ушбу ЙТҲ қандай содир бўлганини эслолмайман”, деган у.
Жабрланган машина ҳайдовчиси эса Алишер Яхшибеков бошқарувидаги Cobalt қувиб ўтиш қоидасини бузган ҳолда унинг йўлига чиққанини билдирган.
“ЙТҲ менинг йўналишимда содир бўлди. Cobalt камида 140 км/соат тезликда ҳаракатланиб келиб, тахминан 40-50 метр қолганда йўналишимга чиқиб кетди. Машинамни кескин тормозладим. Cobalt келиб урилди ва машинам қарама-қарши томондаги чуқурликка тушиб, ағдарилди”, деган жабрланувчи ҳайдовчи.
“Ноҳақлик бўляпти”
Ушбу ЙТҲда оғир тан жароҳати олиб, тўшакка михланиб қолган Мадина Инамованинг укаси Kun.uz билан боғланиб, ҳолат бўйича ноҳақлик бўлаётганини маълум қилди.
“Ҳокимнинг жиянини қамоққа олмади, ноҳақлик бўляпти. 4 ойдан бери келиб хабар олмайди ёки нима бўлди демайди. Опам қарийб ногирон бўлиб қолди. Ўқитувчи эди. 3 нафар боласи бор”, дейди у.
Тергов ҳужжатларига кўра, гувоҳ тариқасида сўроқ қилинган Мадина Инамова даволаниш учун 170 млн сўм сарфлаганини айтган.
“Оқ рангли Cobalt йўлимизга чиқиб келди. Кейин нима бўлганини билмайман. Ўзимга келганимда шифохонада эканман. Ётиб даволандим, 170 млн сўм харажат қилдим. Қарама-қарши йўналишга чиққан ҳайдовчи хабар олмади”, деган у.
Судга оид тиббиёт экспертизасининг 22 майдаги хулосасида Мадина Инамованинг жароҳати ҳаёт учун хавфли бўлган оғир тан жароҳати сифатида баҳоланган.
Ҳайдовчи очиқда қолган
Ҳолат юзасидан Жиноят кодексининг 266-моддаси 3-қисми “а” банди билан (транспорт воситалари ҳаракати ёки улардан фойдаланиш хавфсизлиги қоидаларини бузиш одамлар ўлимига сабаб бўлиши) жиноят иши қўзғатилган. 2026 йил 29 май куни Алишер Яхшибековга нисбатан гаров эҳтиёт чораси қўлланган.
Kun.uz 1993 йилда туғилган Яхшибеков Алишер Дилшод ўғли Фориш тумани ҳокими Исломов Соҳиб Яхшибековичнинг акаси Исломов Дилшод Яхшибековичнинг ўғли эканини аниқлади.
Эслатиб ўтамиз, одамлар ўлимига ва бошқа оғир оқибатларга сабаб бўлган йўл транспорт ҳодисасини содир этиш муайян ҳуқуқдан маҳрум қилиб, 10 йилгача озодликдан маҳрум қилиш билан жазоланади.
