BMT tomonidan qo‘llab-quvvatlanadigan IPC kuzatuv guruhi ayni paytda G‘azoda minglab bolalar to‘yib ovqatlanmayotgani, oqibatda kichik yoshdagi bolalar orasida ochlik bilan bog‘liq o‘lim ko‘payganini bildirdi. «Chegara bilmas shifokorlar» tashkiloti esa «oziq-ovqat mashinalari to‘la yuk mashinalari G‘azo chegarasida turganida, parashyutdan arzimagan yordam tashlash bu – mazax qilishdir», deya Isroilni tanqid qildi.
«G‘azoda yuz berayotgan insonparvarlik fojiasini havodan tashlangan yordam yuklari bilan to‘xtatib bo‘lmaydi. G‘azo sektorida eng yomon holat ocharchilik ssenariysi – hozirda ro‘y bermoqda», deyiladi BMT bilan hamkorlikda ishlovchi Oziq-ovqat xavfsizligi bosqichlarini integrallashgan tasnifi (Integrated Food Security Phase Classification) IPCʼning ogohlantiruvchi hisobotida.
Ularning ta’kidlashicha, «darhol va to‘sqinliksiz» insonparvarlik yordami G‘azoga kiritilmaguncha, ochlik va o‘lim holatlari keskin ortishda davom etadi. The Guardian nashrining yozishicha, bu bayonot IPC tomonidan G‘azoda ocharchilik rasman e’lon qilinayotganini anglatmaydi, biroq ogohlantiruvda quyidagilar qayd etilgan:
«To‘yib ovqat yemaslik, oziqlanish yetishmovchiligi va kasalliklar keng tarqalmoqda. Bular ochlikdan kelib chiqayotgan o‘limlar sonining oshishiga sabab bo‘lmoqda».
So‘nggi ma’lumotlarga ko‘ra:
- G‘azoning aksariyat hududlarida oziq-ovqat iste’moli ocharchilik mezonlariga yetgan;
- G‘azo shahrida esa keskin oziq-ovqat yetishmovchiligi holatlari kuzatilmoqda.
Hisobotda ta’kidlanishicha, 2024 yilning iyul oyi birinchi yarmida bolalar orasida «oziq-ovqat yetishmovchiligining og‘ir shakli» keskin oshgan. Aprel oyi boshidan iyul oyi o‘rtalarigacha 20 000 dan ortiq bola davolanish uchun shifoxonalarga yotqizilgan, ulardan 3000 nafardan ortig‘i – og‘ir ahvolda.
