Россияда грипп билан касалланиш йил давомида кескин ошди: 2021 йилга нисбатан касалланганлар сони 11 мартага кўпайди, деб хабар берди РБК агентлиги 15 декабрь, пайшанба куни Роспотребнадзорга таяниб. Идорадан таъкидланишича, жорий йилнинг январь-февраль ойларида грипп билан касалланиш ҳар 100 минг аҳолига 7,87 тани ташкил этган. Шу билан бирга, ўтган йилнинг шу даврида бу кўрсаткич ҳар 100 минг аҳолига 0,71 даражасида эди.
Роспотребнадзор маълумотларига кўра, декабргача 74 миллион россиялик гриппга қарши эмланган бўлса, ўтган йилнинг декабрида 85,9 миллион, 2019 йил декабрида эса 73,9 миллион киши эмланганди. Ушбу ҳафтада идора сўнгги етти кун ичида Россияда ЎРВИ ва грипп билан касалланиш 35,4 фоизга ошгани ҳақида хабар берди. Касалланганларнинг энг кўпи Тюмен, Ёқутистон, Астрахан, Коми, Ханти-Мансийск, Бурятия, шунингдек, Кострома ва Вологдада қайд этилди.
Россиянинг 82 та ҳудудида «чўчқа гриппи» аниқланган. Бундан ташқари, Россияда 13 декабрь ҳолатига кўра, ўтган ҳафтага нисбатан 11 фоизга кўп – 48 мингта коронавирус инфекцияси ҳолати қайд этилган.
Шу билан бирга, Германияда Роберт Кох институти (RKI) ҳам ўтган ҳафта грипп билан касалланишнинг кескин ўсишини қайд этди - касалликнинг 44 300 га яқин ҳолатлари лаборатория томонидан тасдиқланган, бу бир ҳафта олдингига нисбатан 58 фоизга кўп. Беморларнинг деярли тўққиз фоизи касалхонага ётқизилиши керак бўлган.
RKI томонидан 14 декабрь куни эълон қилинган хулосага кўра, октябр ойи бошидан буён Германияда 227 та грипп тарқалиши қайд этилган бўлиб, бунда бештасида касалланиш ҳолатлари қайд этилган, улардан 81 таси мактабларда, 79 таси болалар боғчаларида кузатилди. 64 киши грипп инфекцияси оқибатларидан вафот этди.
