Украинада уруш бошланганидан бери Европа иттифоқи шамол ва қуёш энергиясини ҳар қачонгидан ҳам кўпроқ ишлаб чиқаряпти. Бундай хулосага Ember ва E3G компаниялари томонидан олиб борилган ва 18 октябр, сешанба куни чоп этилган тадқиқот муаллифлари келишди.
Ушбу маълумотларга кўра, жорий йилнинг март ойидан сентябрь ойигача ЕИда электр энергиясининг деярли чорак қисми (24 фоиз) шамол ва қуёш энергиясидан фойдаланган ҳолда ишлаб чиқарилган. Ўтган йили бу кўрсаткич 21 фоизни ташкил этган эди. Тадқиқот муаллифларининг таъкидлашича, бу икки қайта тикланадиган манбалар 2022 йилнинг мартидан сентябригача 345 тераватт-соат электр энергияси ишлаб чиқарган, бу 2021 йилнинг шу даврига нисбатан 39 ТВт/соатга кўпдир.
Умуман олганда, таҳлилчилар Европа иттифоқининг 19 та давлати шунга ўхшаш рекордларни ўрнатишга муваффақ бўлганини таъкидлади. Хусусан, Германия март ойидан буён қуёш ва шамолдан 104 ТВт/соат электр энергияси олди, бу умумий электр энергиясининг қарийб учдан бирига тўғри келади. Бундан ташқари, Франция, Италия, Полша ва Испанияда максимал кўрсаткичларга эришилди.
Мутахассисларнинг фикрига кўра, «яшил» электр энергиясининг рекорд даражада ишлаб чиқарилиши ЕИга газ сотиб олишдан тахминан 11 миллиард евро тежаш имконини берди. «Шамол ва қуёш энергияси аллақачон европаликларга ёрдам бермоқда. Аммо келажакдаги салоҳият бундан ҳам катта», - дейди Ember вакили Крис Росслоу.
Россиянинг Украинага тўлиқ миқёсли бостириб кириши бошланганидан бери Европа иттифоқи еттита кенг кўламли санкциялар пакетини қабул қилди. Унда, жумладан, Россиядан энергия ташувчилар импортини рад этиш ёки сезиларли даражада қисқартириш ҳам бор. Бундан ташқари, Россиянинг «Газпром» компанияси сўнгги ойларда Европанинг бир қатор давлатларига газ етказиб беришни бир томонлама тўхтатди.
