“ОАВнинг рафиқам Карол ва оиламнинг бошқа аъзолари Япониядан кетишимга алоқадорлиги ҳақидаги таъкидлари ёлғон ва ҳақиқатга мос келмайди. Мен кетишимни ўзим ташкиллаштирдим. Менинг оиламнинг бунда ҳеч қандай роли йўқ”, деб айтилган Гон баёнотида.
31 декабрда Японияда молиявий фирибгарликлар учун уй қамоғида ушланган Гон Япониядан Ливанга қочиб кетгани маълум қилинган. Кейинроқ унинг ўзи Ливанда эканини тасдиқлаган.
The Wall Street Journal нашри вазиятдан хабардор манбаларга асосланиб, Гоннинг Япониядан қочиши унинг яқинлари томонидан бир неча ҳафта давомида режалаштирилгани, унинг рафиқаси бунда асосий роллардан бирини ўйнаганини маълум қилган.
Таъкидланишича, Гон Токиодаги уйидан мусиқа асбоби ғилофида олиб чиқиб кетилган бўлиши мумкин. Сўнгра у Туркияга, у ердан Ливанга етказилган.
Туркияда Гоннинг Истанбулга келиши юзасидан тергов ташкиллаштирилиб, унинг доирасида 7 киши, жумладан 4 учувчи ҳибсга олинди.
