23 июлдан бошлаб фитосанитар талабларни энг кўп бузган Ўзбекистоннинг 5 та экспортчиси томонидан Россияга карантин назорати остидаги маҳсулотлар олиб кирилиши чекланмоқда, деб хабар берди Росселхознадзор.
Ушбу экспортчилар томонидан етказиб берилаётган маҳсулотларнинг асосий қисмини карам, пиёз, укроп, петрушка, узум, лавлаги, помидор ҳамда бошқа қишлоқ хўжалиги маҳсулотлари ташкил этади.
“Қарор Ўзбекистондан Россияга олиб кирилаётган карантин назоратидаги маҳсулотларда карантин объектлари аниқланиши ҳолатлари кўпайгани ҳамда Россия ҳудудининг озиқ-овқат хавфсизлиги ва фитосанитар барқарорлигини таъминлаш, карантин зараркунандалари ва касалликларининг кириб келиши ва тарқалишининг олдини олиш мақсадида қабул қилинди”, дейилади хабарда.
Қайд этилишича, 2026 йил бошидан буён 132 марта помидор мевасининг қўнғир буришиш вируси, жанубий америка помидор куяси, ғарбий (калифорния) гул трипси, лавлаги томирларининг некротик сарғайиш бенивируси каби карантин объектлари аниқланган.
“Россия ва халқаро фитосанитар талабларнинг мунтазам равишда бузилиши Ўзбекистоннинг Россия бозорига етказиб берилаётган карантин назоратидаги маҳсулотлар хавфсизлигини таъминлаш тизими етарлича самарали эмаслигини кўрсатмоқда”, дейилган Росселхознадзор хабарида.
Чекловлар айнан қайси экспортчиларга нисбатан киритилгани айтилмаган.
