Air China O‘zbekistonga birinchi parvozni amalga oshirdi

Xitoyning Air China aviakompaniyasi O‘zbekistonga birinchi qatnovni amalga oshirdi.

19 iyul kuni Pekindan uchgan Boeing 737 Max 8 samolyoti Islom Karimov nomidagi Toshkent xalqaro aeroportiga qo‘ndi. Samolyot an’anaviy suv arkasi bilan kutib olindi.

Iyul oyi boshida «O‘zaviatsiya» agentligi tomonidan O‘zbekiston va Xitoy o‘rtasida havo qatnovi to‘g‘risidagi hukumatlararo bitimga asosan, Air China aviakompaniyasiga Pekin-Toshkent-Pekin va Urumchi-Toshkent-Urumchi yo‘nalishlarida muntazam aviaqatnovlarni amalga oshirish uchun ruxsatnoma berilgan edi.

Air China — Xitoyning eng yirik davlat aviakompaniyalaridan biri bo‘lib, 1988 yilda tashkil etilgan. Kompaniya dunyoning 200 ga yaqin shahriga reyslarni amalga oshiradi. Uning havo kemalari parkida 500 dan ortiq samolyot bor.