Saudiya Arabistoni banklariga mijozlar bilan WhatsApp orqali muloqot qilish taqiqlandi

Saudiya Arabistoni Markaziy banki mijozlar bilan muloqotda WhatsApp kabi tezkor ma’lumot almashish ilovalaridan foydalanishni taqiqladi. Ushbu qaror xavfsizlikdagi ehtimoliy muammolar bilan bog‘liq: podshohlik moliyaviy regulyatori bu kabi servislarni ishonchli emas deb topdi.

Markaziy bank moliyaviy tashkilotlarga rasmiy mobil ilovalar yoki veb-saytlarga chat yoki chatbot xizmatlarini integratsiya qilish kabi nisbatan xavfsiz aloqa kanallarini o‘rganishni topshirdi.

Tashkilotlar, shuningdek, bo‘linmalar, mijozlarni qo‘llab-quvvatlash va marketing xizmati xodimlarini yangi direktivalar talabiga o‘rgatishi kerak.

Saudiya Arabistoni banklari huzuridagi OAV va xabardorlik qo‘mitasi firibgarlik holatlari ko‘payib borayotganidan ogohlantirdi. Ta’kidlanishicha, firibgarlar o‘zlarini xayriya tashkilotlari vakillari va jamoat arboblari sifatida tanishtirib, ijtimoiy tarmoqlar hamda ilovalar orqali pul yig‘moqda.

Saudiya Arabistoni hukumati rasmiy hisob-kitoblar va xizmat to‘lovlarini to‘lashda CADAD tizimidan — mamlakatning barcha bank ilovalarida mavjud xavfsiz to‘lov tizimidan foydalanishni tavsiya qiladi.

Saudiya Arabistoni banklari huzuridagi OAV va xabardorlik qo‘mitasi 2006 yilda mamlakat Markaziy banki homiyligida jamiyatda bank madaniyatini shakllantirish maqsadida tashkil etilgan. Uning asosiy vazifasi — moliyaviy savodxonlik hamda aholining turli qatlamlari orasida bank xizmatlari va mahsulotlarini targ‘ib qilishdan iborat.