Ислом Каримов номидаги Тошкент халқаро аэропорти автотураргоҳида йўл қопламаси қўпориб олиниб, таъмирланаётгани, аммо жараёнда хавфсизлик қоидаларига амал қилинмаётгани хабар қилинди. Таҳририятга келиб тушган суратларда ҳақиқатан ҳам ҳудуд махсус тўсиқлар билан ўраб олинмагани кўринади.
“Келаётган чет эллик меҳмонлар ва юртдошларимизнинг чиқиш йўлаги умуман ўралмаган ва чангдан ҳимоя қилинмаган. Ҳамма ёқ чанг-тўзон. Кутаётган одамлар ва меҳмонлар чанг ичида турибди. Аэропорт ходимлари эса бу ҳолатга жимгина қараб ўтиришибди. Аэропорт маъмурияти “сизнинг шикоятингизга 15 кун ичида жавоб берамиз” деб, гапни қисқа қилиб қўйишди. Тартиб умуман йўқ”, – дейилади мурожаатда.
Ҳолат юзасидан “Uzbekistan Airports” АЖнинг Kun.uz’га маълум қилишича, аэропортнинг учиб келиш зали ёнидаги автотураргоҳда йўл қопламасида ҳақиқатан ҳам таъмирлаш ишлари олиб бориляпти. Шу муносабат билан шаҳарга чиқаётган йўловчилар учун чиқиш йўли чап томонга, яъни такси йўлагининг ортига кўчирилган.
“Кутиб олувчилар залига кириш шаҳар тарафдан амалга оширилади. Автотураргоҳ ҳудудидаги таъмирлаш ишлари уч кун ичида якунланиши кутилмоқда. “Uzbekistan Airports” ва “Тошкент” аэропорти номидан вақтинчалик ноқулайликлар учун йўловчилар ва кутиб олувчилардан узр сўраймиз”,– дейилади изоҳда.
Эслатиб ўтамиз, аввалроқ Тошкент халқаро аэропортининг реконструкцияси доирасида янги учиб кетиш зали очилганди. Унинг сўнгги босқичи шу йил сентябрь ойида бошланиши режа қилинган, жараён 2025 йилнинг сўнгигача давом этади. Ишлар якунига етказилгач, ўтказиш имконияти йилига 13 миллион йўловчига етказилади.
