Британия Украинага Россия ҳудудига ҳужум учун Storm Shadow қанотли ракеталаридан фойдаланишга рухсат беришга қарор қилди, деб хабар берди The Guardian газетаси 11 сентябр, чоршанба куни кечқурун Британия ҳукуматидаги манбаларига таяниб. Бу ҳақда нашр АҚШ давлат котиби Энтони Блинкен ва Британия ташқи ишлар вазири Дэвид Лэммининг 11 сентябр куни Киевга қўшма ташрифига бағишланган мақоласида айтиб ўтган. Сафар чоғида улар Украина президенти Володимир Зеленский билан учрашиб, Ғарб узоқ масофага мўлжалланган қуролларининг Россия ҳудудига зарбаларини муҳокама қилишган.
Газета манбаларининг таъкидлашича, Блинкен ва Лэмми Киевга Storm Shadow бўйича ижобий қарор қабул қилингани учун бирга келган. Шу билан бирга, The Guardian қайд этишича, агар Лэмми қарорни Киевда эълон қилганида эди, унинг сўзлари кераксиз провокация сифатида қабул қилиниши мумкин эди.
Нашрнинг қўшимча қилишича, Украинанинг ракеталардан фойдаланиши «кераксиз ҳужумлар олдини олиш учун» чекловларга дучор бўлиши мумкин. Блинкен Киевга ташрифи чоғида Қўшма Штатлар биринчи кунданоқ Украинадаги жанг майдонидаги вазият ўзгарганлиги сабабли ўз сиёсатини мослаштиришга тайёр бўлганини айтди. «Биз буни давом эттирамиз», деди у.
Ракеталардан фойдаланиш бўйича эҳтимолий чекловлар
Блинкен Киевнинг урушда қандай мақсадлари борлиги ва уларга эришиш учун Вашингтон нима қилиши мумкинлигини Зеленский ва бошқа украиналик расмийлардан бевосита эшитишни истаётганини айтди, деб ёзади Reuters.
Учрашувдан сўнг Зеленский Блинкен ва Лэмми билан «жуда мазмунли ва узоқ суҳбат» ўтказганини айтди. «Барча асосий масалалар муҳокама қилинди, бу Украинанинг аргументларини эшитиш, узоқ масофали қуроллар, фронтда жанговар бригадалар билан таъминлаш ва адолатли тинчликни яқинлаштириш бўйича умумий стратегияга тааллуқлидир», — деди Зеленский.
Қарор очиқ эълон қилинмайди
Украина президенти билан учрашувдан сўнг Блинкен Киевнинг АҚШ президенти Жо Байденга, Лэмми эса Британия бош вазири Кир Стармерга позициясини баён этишга ваъда берди. 13 сентябр куни Вашингтонда АҚШ ва Британия раҳбарлари учрашади. The Guardian нашрининг ёзишича, ушбу учрашув натижасида улар Лондон Украинага Россияга зарба йўллаш учун Storm Shadow’дан фойдаланишга рухсат берганини очиқ эълон қилмасликлари кутилмоқда.
Украина қуролли кучлари Қримга зарба бериш учун ATACMS ва Storm Shadow’дан фойдаланган. Зеленский бир неча ой давомида Ғарб давлатларидан Украинага Россия ҳудудига ҳужум қилиш учун Американинг ATACMS ва Британиянинг Storm Shadow ракеталаридан фойдаланишига рухсат беришни сўрамоқда. Шу пайтгача АҚШ можаро кучайиб кетишидан хавотирланиб, бундай зарбаларга қарши бўлиб келган.
