Беларус «миллий хавфсизлик манфаатларига зид бўлган» фуқароларга мамлакатни тарк этишни тақиқлаши мумкин, деб хабар берди Zerkalo.io 11 июль, душанба куни. Унга кўра, тегишли ҳужжат – «Беларус Республикасидан (БР) чиқиш ва Беларус Республикаси фуқароларининг Беларус Республикасига кириши тартиби тўғрисида»ги қонун лойиҳаси 23 июнь куни парламентга киритилган.
Шунингдек, «бошқарув тартибига қарши маъмурий ҳуқуқбузарлик содир этиш» моддаси бўйича иш очилган, ҳали суд қарори чиқарилмаган шахсларнинг ҳам чиқиб кетиши тақиқланади. Zerkalo.io’нинг аниқлик киритишича, гап, хусусан, Маъмурий жавобгарлик тўғрисидаги кодекснинг «сиёсий» моддалари: мансабдор шахснинг қонуний талабига бўйсунмаслик, оммавий тадбирларни ўтказиш тартибини бузиш бўйича таъқиблар ҳақида кетмоқда.
Ҳуқуқ-тартибот идоралари ходимлари Беларусни фақат расмийлар билан келишилган ҳолда тарк этишлари мумкин бўлади. Бунгача ушбу қоида ёзилмаган тарзда амалга қилган. Тартиб, шунингдек, ҳарбий хизматчиларга, ҳарбий тузилмаларнинг хизматчилари ва фуқаролик ходимларига, шунингдек, Беларус ҳарбийлаштирилган ташкилотларига ҳам тегишли.
Биометрик паспорт Беларусдан чиқиб кетиш ёки мамлакатга кириш учун рухсат берувчи расмий ҳужжатлар рўйхатига киритилади.
Қонун лойиҳаси сентябр ойида парламентнинг кузги сессиясида кўриб чиқилиши керак. Кучга кириши учун у Вакиллар палатаси томонидан қабул қилиниши, кейин эса Республика кенгаши томонидан тасдиқланиши лозим. Ҳужжат Беларус раҳбари Александр Лукашенко томонидан имзоланганидан кейин у қонун мақомига эга бўлади ва Миллий юридик интернет порталида расман эълон қилинади. Ҳуқуқни муҳофаза қилиш органлари ходимларининг ҳокимият рухсатисиз чиқиб кетишини тақиқлаш қонун қабул қилингандан кейин икки ой ўтгач, бошқа ўзгартиришлар - ҳужжат эълон қилинганидан кейин дарҳол кучга киради.
