Красноярск ўлкаси
Ёнғин шанба куни Красноярск ўлкасидаги йигирмага яқин пунктларини қамраб олди. Сўнгги маълумотларга кўра, регионда етти киши ҳалок бўлиб, 19 киши яраланган, уларнинг олти нафари ўт ўчирувчилар. Шанба куни Талажанка ва Никольск қишлоқларида беш киши, Ачинскдаги ёнғинда яна икки киши ҳалок бўлган.
Расмийлар хабарига кўра, Красноярск ўлкасида аномал ёнғинлар туфайли 518 та турар жой, 309 та иморат ва 61 автомобил жиддий зарарланган ёки буткул яксон бўлган. Аввалроқ Россия ўрмон хўжалиги бир неча аҳоли пунктларид 350 уй тўлиқ ёниб кетганини хабар қилганди.
Ҳукумат ёнғин сабаби электр узатиш линиясидаги қисқа туташув билан боғлиқ эканини айтишган: элекр узатиш линияси кучли шамоллар туфайли шикастланганди, шамол олов кенг тарқалишини ҳам таъминлаган.
«Интерфакс»нинг ёзишича, шамол тезлиги сониясига 40 метрни ташкил этган, натижада дарахтлар йиқилиши, электр узатиш линиялари устма-уст тушиши бир вақтнинг ўзида кўплаб ҳудудларда ёнғин чиқишига олиб келган.
ФВВ маълумотига кўра, кучли шамоллар ёнғинни ўчиришда авиациядан фойдаланишга имкон бермаяпти.
Оммавий ёнғинлар туфайли Красноярск ўлкасида фавқулодда ҳолат режими жорий этилган.
Ёнғинга қарши кураш ишлари 13 районда олиб борилмоқда. ТАСС хабарига кўра, айни вақтда уйи ёниб кетганларнинг кўпчилиги қариндошлариникида қолмоқда.
Кемерово области
Кемерово областининг Тяжинский округида тўрт киши ёнғин қурбонига айланган. «Интерфакс» агентлиги навбатчи диспетчерлик хизматига асосланиб хабар беришича, бу ҳудудда 143 уй ёниб кетган, 224 киши бошпанасиз қолган, одамлар вақтинча қариндошлариникида жойлашган.
ФВВнинг ҳудудий бошқармасига кўра, Иркутск областининг Братск ва Тайшетск районларидаги ёнғинлар бартараф этилган.
Иркутск области
Иркутск областидаги ёнғинлар натижасида икки киши ҳалок бўлган, губернатор Игорь Кобзевнинг хабар беришича, регионда фавқулодда ҳолат режими киритилган. Якшанба куни ҳудудда 30 дан ортиқ ёнғин ўчоқлари қайд этилган.
«Моргудон посёлкасида 35 уй жабрланган. Асосан нотурар жойлар. Бир пенсионер ҳалок бўлган. 150 нафарга яқин киши эвакуация қилинган», дея ёзган губернатор ўз телеграм-каналида. «Братск мэри Сергей Серебренниковнинг сўзларига кўра, икки киши ҳалок бўлган», дейилади унинг кейинги постида.
Шанба куни Иркутск областининг икки аҳоли пунктида - Братск районидаги Моргудонда ва Тайшетск районидаги Половино-Черемхово қишлоғида йирик ёнғинлар юзага келган.
Хабар қилинишича, оловни ўчириш учун ҳудуд маъмуриятидан олтита трактор ва иккита бульдозер жалб этилган. Ёнғинни ўчириш ишларида 69 киши ишламоқда, 25 дона техника, жумладан ўт ўчириш поездидан фойдаланилмоқда. ФВВнинг Иркутскдаги бошқармасидагилар шикоят қилишича, сув манбалари йўқлиги ва кучли шамол туфайли ёнғинни ўчириш ишлари мураккаблашмоқда.
«Интерфакс» маълумотига кўра, Кемерово областида еттита ўт ўчириш автоцистернаси ва иккита суғориш машинаси ишламоқда. Красноярск ўлкаси раҳбарияти қўшни регионлардан ёнғинларни ўчиришда ёрдам сўраган.
Омск области
Аввалроқ ўрмон ёнғинлари Омск областида ҳам кузатилганди, бу ҳудуд расмийлари ҳам ёнғинга электр симлари узилиши сабаб бўлганини айтишган ва ҳолат юзасидан жиноят иши очилган.
Називаевский райони ҳудудий электр тармоқлари бошлиғи бир кун аввал район марказида содир бўлган кучли ёнғиндан сўнг ҳибсга олинган, губернатор Александр Бурковнинг хабар қилишича, бу ерда ёнғин натижасида 29 та турар жой ва 23 та нотурар жой шикастланган.
Губернаторнинг изоҳлашича, аксар ҳолларда ёнғинларга электр симларидаги қисқа туташув сабаб бўлган: «Шамол туфайли симларнинг бир-бирига ёпишиб қолиши рўй берган, бу эса трансформатор подстанцияларида қисқа туташувларга олиб келган, ундан кейин олов аҳоли пунктларига тарқалиб кетган. Кеча биз одамларни электр тармоқларидаги қисқа туташувлардан ҳимоя қилиш мақсадида 51 мингдан ортиқ киши яшайдиган 184 аҳоли пунктини токдан узишга мажбур бўлдик».
Бироз аввалроқ Омск областида 115 та қурилма (шундан 70 таси аҳоли турар жойи) олов ичида қолган аҳоли пунктида олтита ёнғин ўчоғи ўчирилгани хабар қилинганди. Бу ерда икки киши ҳалок бўлган. Қизил Хоч жамиятининг Омск бўлими ёнғинлардан жабрланганлар учун гуманитар ёрдам йиға бошлаган.
