«Яндекс» бош директори Елена Бунина ўз лавозимини тарк этади, компанияга унинг ўрнига Артём Савиновский вақтинчалик раҳбарлик қилиб туради.
The Bell Бунинанинг «Яндекс» ички форумидаги хабарига асосланиб у Россияни феврал охирларида тарк этганини ёзди. Бунинанинг сўзларига кўра, у ҳозирда «Яндекс»нинг Исроилдаги офисида HR-директор лавозимида ишламоқда.
Бунина Украинада ҳарбий ҳаракатлар бошланишидан олдин Кипрга таътилни ўтказиш учун кетгани, сўнгра Исроилга кўчиб ўтгани ва «ҳарбий операция»га қаршилиги сабабли Россияга қайтишни режалаштирмаётганини билдирган.
«Мен қайтмайман: қўшнилари билан уруш қиладиган мамлакатда яшолмайман», – деб ёзган у.
Бунина 2011 йилда «Яндекс» HR-директори этиб тайинланган, 2017 йилда эса бош директор бўлганди. Маълумот берилишича, у 15 апрелдан бош директорликдан расман бўшайди.
