ЕК: Киев коррупцияга қарши органлар мустақиллигини сақлаши керак

Украина коррупцияга қарши курашувчи органларнинг мустақиллигини таъминлаши керак. Бу ҳақда Еврокомиссия (ЕК) раиси Урсула фон дер Ляйен 27 июл, якшанба куни X ижтимоий тармоғида Украина президенти Володимир Зеленский билан суҳбатдан сўнг ёзди.

«Украина ўзининг Европа йўлида аллақачон кўп ютуқларга эришди. У ана шу мустаҳкам пойдеворларга асосланиши ва Украинада қонун устуворлигининг асоси бўлган мустақил коррупцияга қарши органларни сақлаб қолиши керак», — дея таъкидлади ЕК раҳбари.

Киев «ўзининг Европа йўлида тараққиётга эришишда бизнинг ёрдамимизга ишониши мумкин», дея қўшимча қилди фон дер Ляйен.

Украина президенти Володимир Зеленский X ижтимоий тармоғида 24 июлдаги коррупцияга қарши кураш органлари тўғрисидаги янги қонун лойиҳаси «кечиктирмасдан, шу ҳафтада» қабул қилиниши кераклигига ишонч билдирди.