Олий суд электр таъминотидаги муаммолар сабабли интерактив хизматларини вақтинча тўхтатди

Идора матбуот хизматининг маълум қилишича, Тошкент шаҳар Абдулла Қодирий кўчасида жойлашган Олий суд биносида электр таъминоти билан боғлиқ узилишлар кузатилмоқда. Шу муносабат билан Олий суднинг барча интерактив хизматлари фаолияти вақтинча тўхтатилган.

«Юзага келган ноқулайликлар учун узр сўраган ҳолда электр таъминоти тўлиқ тиклангач, ахборот тизимлари тўлиқ ишга туширилиши маълум қилинади”, дейилади Олий суд хабарида.

Олий суднинг тегишли порталида ўндан ортиқ интерактив хизматлардан фойдаланиш, шунингдек суд раҳбарияти қабулига ёзилиш имкони мавжуд.

Шу кунлардан об-ҳавонинг юқори даражада кўтарилиши ортидан ижтимоий тармоқларда пойтахт Тошкентнинг кўплаб ҳудудларда электр энергиясида тез-тез узилишлар бўлаётгани ҳақида хабарлар тарқалмоқда.

UPD: Маълум қилинишича, бир неча соатдан сўнг Олий суд биносида электр таъминоти тикланиб, унинг ахборот тизимлари ва интерактив хизматлари фаолияти босқичма-босқич ишга туширилмоқда.