Ҳиндистонда ҳаракатдаги поезддан тушиб кетган 6 киши ҳалок бўлди

Ҳодиса Мумбайдан Лакхнау томон ҳаракатланаётган Pushpak Express поездида юз берган. Шунингдек, яна олти киши жароҳат олган.

Фото: AP

Ҳиндистоннинг Маҳараштра штатида ҳаракатланаётган поезддан тушиб кетган олти киши ҳалок бўлди ва яна шунча одам жароҳат олди. Бу ҳақда маҳаллий полицияга таяниб The Indian Express газетаси хабар берди.

Маълумотларга кўра, ҳодиса Мумбайдан Лакхнау томон ҳаракатланаётган Pushpak Express поездида, Дива ва Копар станциялари оралиғида содир бўлган.

Қайд этилишича, поезд одамларга тўла бўлгани етмаганидек, вагонлар эшикларида ҳам одамлар осилиб олган. Полиция вакилининг аниқлик киритишича, жабрланганларнинг барчаси шифохонага етказилган, уларнинг олти нафари вафот этган. Унинг сўзларига кўра, ҳалок бўлганлар 30-35 ёш оралиғидаги фуқаролардир.

Ҳиндистон Темирйўл транспорти вазирлигининг қўшимча қилишича, поездларнинг тўлиб кетиши йўловчилар оқимининг кўплиги ва мамлакатда транспорт инфратузилмаси етарли эмаслиги билан боғлиқ. Вазирликнинг маълум қилишича, мазкур воқеадан кейин Мумбай атрофидаги ҳудудларда ҳаракатланувчи поездлар автоматик ёпиладиган эшиклар билан жиҳозланади.

Тайёрлаган: Фозилбек Юсупов

#Ҳиндистон #поезд